Blog (Online Portfolio)

Sunday, April 13, 2025

Katitikan ng Pulong

Katitikan ng Pagpupulong ng Komite sa Fiesta

Petsa: Marso 6, 2025
Oras: 9:00 AM – 12:00 PM
Lugar: Casuntingan, Barangay Hall

Namuno sa Pulong: Kapitan Juan Carlos De Leon
Tagatala: Maria Clara Garcia

1. Pagbubukas ng Pulong

Ang pagpupulong ay pormal na binuksan ni Kapitan Juan Carlos De Leon noong 9:00 AM.

2. Dumalo sa Pulong

Naroon:

Kapitan Juan Carlos De Leon (Punong Barangay)
Maria Clara Garcia (Kalihim)
Rafael Gabriel Cruz (SK Chairman)
Liza May Soriano (Kagawad ng Barangay)
Miguel Angelo Lopez (Kagawad ng Barangay)
Andrea Celeste Rivera (Kagawad ng Barangay)
Isabel Loraine De Guzman (Kagawad ng Barangay)
Rico Andres Magbanua (Kagawad ng Barangay)
Samuel Justin Navarro (Kagawad ng Barangay)

3. Pag-apruba ng Nakaraang Katitikan

Ang mga katitikan ng nakaraang pulong ay nilapaso at inaprubahan nang walang nagtutol.

4. Talakayan Tungkol sa mga Gaganaping Aktibidad sa Fiesta ng Barangay Casuntingan

4.1. Abril 17, 2025 – Prosisyon (Kapitan Juan Carlos De Leon, 5:00 PM)

Ipinahayag ni Kapitan De Leon na magsisimula ang prosisyon sa harap ng Casuntingan Barangay Hall at mag-iikot sa buong barangay. Hinihikayat ang lahat ng miyembro ng komunidad na lumahok. Mayroong mga tanod at pulis na nakatalaga upang masigurado ang seguridad.

4.2. Oktubre 17, 2025 – Perya Ride Opening (Kapitan Juan Carlos De Leon, 6:00 PM)

Ipinaliwanag ni Kapitan De Leon na ang perya ay magbubukas sa Barangay Casuntingan Plaza at tatagal ng isang linggo. Magkakaroon ng iba't ibang rides tulad ng Vikings at Ferris Wheel, pati na rin ang mga booth games. Ipinagpaalala ang mga safety guidelines upang maiwasan ang aksidente.

4.3. Oktubre 19, 2025 – Variety Show (Rico Andres Magbanua, 7:00 PM)

Ipinresenta ni Kagawad Magbanua ang lineup ng mga pagtatanghal tulad ng sayaw, awitin, at iba pang performances mula sa mga lokal na talento. May espesyal na panauhin din na inaasahang dadalo.

4.4. Oktubre 20, 2025 – Dance Contest (Andrea Celeste Rivera, 7:00 PM)

Ipinaliwanag ni Kagawad Rivera ang mechanics ng dance contest. Bukas ito para sa lahat ng edad at hinihikayat ang bawat purok na magkaroon ng kinatawan.

4.5. Oktubre 21, 2025 – Bingo Night (Miguel Angelo Lopez, 7:00 PM)

Inilahad ni Kagawad Lopez ang bingo night bilang isang fundraising activity para sa mga proyekto ng barangay. Magkakaroon ng mga papremyo at inaasahang dadalo ang marami.

4.6. Oktubre 22, 2025 – Barangay Pageant (Liza May Soriano, 7:00 PM)

Ipinaliwanag ni Kagawad Soriano ang mechanics ng pageant at mga criteria sa paghusga. May mga segments tulad ng best in gown, talent portion, at Q&A.

4.7. Oktubre 23, 2025 – Miss Gay Pageant (Isabel Loraine De Guzman, 7:00 PM)

Ipinahayag ni Kagawad De Guzman na ang Miss Gay Pageant ay isang espesyal na event upang ipakita ang talento at kagandahan ng LGBTQ+ community. Magkakaroon ng iba't ibang segments tulad ng best in runway, talent portion, at Q&A.

4.8. Oktubre 24, 2025 – Grand Disco Night (Andrea Celeste Rivera at Liza May Soriano, 7:00 PM – 12:00 AM)

Ipinaliwanag nina Kagawad Rivera at Soriano na ang huling gabi ng selebrasyon ay magiging isang grand disco night. Magkakaroon ng live music mula sa isang DJ at isang dance floor na bukas para sa lahat.

5. Pagtalakay sa Iba Pang Mahahalagang Bagay

Tiniyak na may sapat na pondo para sa bawat aktibidad at magkakaroon ng mga fundraising kung kinakailangan. Tinalakay rin ang paglalagay ng medical team sa mga pangunahing events upang matiyak ang kaligtasan ng lahat. Hinihikayat ang lahat ng purok na makiisa sa pagpapaganda at paglilinis ng barangay bago ang pista.

6. Pagtatapos ng Pulong

Ang pagpupulong ay pormal na tinapos ni Kapitan Juan Carlos De Leon noong 12:00 PM. Pinayuhan niya ang mga miyembro ng komite na maging maagap at magtulungan upang maging matagumpay ang Fiesta ng Barangay Casuntingan.

Itinala ni:
Maria Clara Garcia
(Tagatala)

Adyenda

AGENDA PARA SA PAGHAHANDA NG FIESTA 2025

Petsa: Ika-31 ng Oktubre 2025
Oras: 8:00 AM - 10:00 AM
Lugar: Casuntingan Barangay Hall

Mga Dadalo:

Alexandra Nicole Baclaan (Punong Barangay)
Sofia Lois Barrios (Brgy. Kagawad)
Cherry Ann Villamero (Brgy. Kagawad)
Jaskha Plarizan (Brgy. Kagawad)
Caroline C. Ceniza (Brgy. Kagawad)
Cherryl Cortes (Brgy. Kagawad)
Chuck Roland Camiras (Brgy. Kagawad)
Rolando Dionson (Brgy. Kagawad)
Erika Nicole Rosario (Brgy. Secretary)

Mga Paksa at Oras ng Talakayan:

Paksa	Taong Tatalakay	Oras
1. Pagbubukas ng Pulong at Layunin	Alexandra Nicole Baclaan (Punong Barangay)	8:00 - 8:10 AM
- Pagtalakay sa layunin ng pulong at mga inaasahang resulta.
2. Presentasyon ng mga Aktibidad para sa Fiesta	Sofia Lois Barrios (Brgy. Kagawad)	8:10 - 8:25 AM
- Detalye ng mga pangunahing aktibidad at programa.
3. Pagbuo ng mga Komite at Pag-a-assign ng mga Gawain	Jaskha Plarizan (Brgy. Kagawad)	8:25 - 8:45 AM
- Pagpaplano ng mga komite at alokasyon ng mga responsibilidad.
4. Pag-uulat ng Kalagayang Pinansyal	Erika Nicole Rosario (Brgy. Secretary)	8:45 - 9:05 AM
- Pagtalakay sa pondo at pagkolekta ng kontribusyon.
5. Pagtanggap ng mga Mungkahi at Komento mula sa mga Dumalo	Rolando Dionson (Brgy. Kagawad)	9:05 - 9:20 AM
- Pagbibigay ng pagkakataon sa lahat na magbigay ng opinyon.
6. Pagtalakay sa Mga Final na Hakbang	Alexandra Nicole Baclaan (Punong Barangay)	9:20 - 9:50 AM
- Final na plano para sa mga susunod na hakbang at paghahanda.
7. Pagwawakas ng Pulong	Alexandra Nicole Baclaan (Punong Barangay)	9:50 - 10:00 AM
- Pagtatapos ng pulong at pagpaplano ng susunod na pagpupulong.

Layunin ng Pulong:

Pagplano at pagpaplano ng mga aktibidad at komite para sa Fiesta 2025.
Pag-audit ng mga pinansyal na pangangailangan at kontribusyon.
Pagtanggap ng mga ideya at mungkahi mula sa mga dumalo upang mapabuti ang plano.
Pagpapa-finalize ng mga hakbang bago ang Fiesta 2025.

Syntesis

Sintesis: Ang Epekto ng Digmaan

Ang digmaan ay may malaking epekto sa buhay ng tao at ng buong lipunan. Hindi lang ito nagdudulot ng pagkasira ng mga ari-arian at pagkamatay ng mga tao, kundi nag-iiwan din ng matinding sugat sa mga nakaligtas. Kasama na rito ang trauma na nararamdaman ng mga sundalo at sibilyan na nakaranas ng digmaan, na tumatagal ng maraming taon.

May mga nagsasabi na ang digmaan ay isang paraan para ipakita ang lakas ng isang bansa. Para sa mga lider ng digmaan, ito ay isang paraan ng pagtatanggol. Ngunit, madalas, ang mga nanalo sa digmaan ang siyang nagsasabi kung ano ang "tama" at "mali," kaya't nagiging hindi pantay ang mga pagkakataon. Ang digmaan ay nagpapalaganap ng galit at pagkamuhi sa pagitan ng mga tao, at nagdudulot ng pagkawasak sa kalikasan.

Sa kabilang banda, may mga nagsasabi na ang digmaan ay nakatulong sa pag-unlad ng teknolohiya at kaalaman. Pero ang mga pag-unlad na ito ay may kabayarang buhay at kalungkutan ng maraming tao.

Sa huli, ang digmaan ay may mabigat na epekto. Habang may mga pagkakataon na nakikinabang ang mga makapangyarihan, ang mga inosenteng tao ang siyang pinakamalaking naapektohan. Kaya't ang tunay na tanong ay: Kailangan ba talaga ng digmaan upang magbago ang mundo, o may mas mabuting paraan para makamit ang kapayapaan?

Talumpati

Talumpati: "Digmaan at Kapayapaan"

Magandang araw po sa inyong lahat.

Ang digmaan ay isa sa pinakamabigat na problema ng mundo. Sa digmaan, maraming buhay ang nawawala, maraming pamilya ang nawawasak, at maraming lugar ang nasisira. Walang panalo sa digmaan—lahat ay may natatalo.

Bakit nga ba may digmaan?

Dahil sa kasakiman, pagkakaiba ng paniniwala, at kagustuhang maghari ng ilan. Ngunit sa huli, ang mga taong walang laban—mga bata, matatanda, at ordinaryong mamamayan—ang siyang labis na naaapektuhan.

Ang sabi ng iba, ang digmaan ay para sa "katarungan." Pero madalas, ang hustisya ay pinipili lang ng mga makapangyarihan. Sila ang gumagawa ng batas, at sila rin ang nagtuturo kung sino ang tama at mali.

Kaya bilang kabataan, bilang mamamayan, mahalaga na matuto tayong piliin ang kapayapaan. Hindi natin kailangang mag-away para sa pagbabago. Maari tayong makipag-usap, magkaintindihan, at magtulungan.

Ang kapayapaan ay nagsisimula sa bawat isa sa atin—sa ating salita, sa ating kilos, at sa ating puso.

Maraming salamat po.

Pictorial Essay

Ang Kuwento ng Katarungan ay Laging Panig ng Nanalo

"Justice is just a label slapped on by the winners."

Sa digmaan, ang "katarungan" ay depende kung sino ang nanalo. Ang nanalo ang nagdidikta kung sino ang bida, at sino ang kontrabida.

Replektibong Sanaysay

Replektibong Sanaysay: Higit Pa sa Marka

Lumaki akong naniniwala na ang academic grades ang sukatan ng katalinuhan at tagumpay. Sa tuwing ipapasa ng guro ang papel na may malaking numerong naka-encircle sa itaas, para bang nabibigyan ako ng kumpirmasyon kung sapat ba ako—kung matalino ba ako, o kung karapat-dapat ba akong purihin. Sa bawat mataas na marka, may kasamang ngiti. Ngunit sa tuwing babagsak ang grado, tila ba nawawala rin ang halaga ko sa sarili kong paningin.

Ngunit habang ako’y lumalalim sa aking paglalakbay bilang estudyante, napagtanto kong ang academic grades ay hindi laging sumasalamin sa tunay na kakayahan ng isang tao. May mga mag-aaral na mahusay magsalita, mahusay sa sining, o may likas na talino sa pakikipagkapwa-tao, ngunit mababa ang grado sa matematika o agham. Ibig bang sabihin nito ay kulang na sila? Hindi. Natutunan kong ang grading system ay nakabatay lamang sa isang bahagi ng ating talino, at hindi nito nasusukat ang kabuuan ng ating potensyal.

Oo, mahalaga ang grado. Isa itong pamantayan sa akademya, at hindi natin ito basta-bastang maiiwasan. Isa rin itong daan para masukat ang ating progreso at disiplina. Ngunit mahalaga ring tandaan na hindi ito ang sukdulang batayan ng ating halaga bilang tao. May mga leksyon sa buhay na hindi matututunan sa loob ng silid-aralan, at may mga uri ng katalinuhan na hindi nasusukat ng papel at lapis.

Sa huli, ang tunay na tagumpay ay hindi lamang nasusukat sa mataas na marka, kundi sa kung paano tayo natututo, lumalago, at tumutulong sa iba gamit ang ating kaalaman. Ang grades ay bahagi lamang ng ating paglalakbay—hindi ang destinasyon.

Bionote

Bionote: Earth (Daigdig)

Si Earth, o mas kilala bilang Daigdig, ay ang ikatlong planeta mula sa Araw at ang tanging kilalang planeta na may buhay. Sa loob ng 4.5 bilyong taon, siya ay naging tahanan ng milyun-milyong uri ng organismo, kabilang na ang sangkatauhan. Taglay niya ang mala-bughaw na karagatan, mayamang kagubatan, malalawak na disyerto, at naggagandahang kabundukan—mga likas na yaman na siyang bumubuhay sa kanyang mga nilalang.

Bilang isang planeta, si Earth ay kilala sa kanyang kakayahang suportahan ang buhay sa pamamagitan ng balanseng klima, tubig, at hangin. Sa kabila ng kanyang kahanga-hangang anyo at kakayahan, siya ngayon ay humaharap sa iba’t ibang hamon tulad ng climate change, polusyon, at pagkaubos ng likas na yaman—mga problemang dulot ng kapabayaan ng kanyang mga anak. Patuloy ang panawagan ni Earth para sa pangangalaga, pagkakaisa, at pagmamalasakit. Isa siyang buhay na paalala na tayo ay bahagi ng kalikasan, hindi ang may-ari nito. Sa bawat pag-iingat natin sa kanya, tayo rin ay nagliligtas ng ating kinabukasan.

Lakbay Sanaysay

Lakbay-Sanaysay: Paglalakbay Patungong Vidden Valley, Pinamungajan

Sa gitna ng abalang buhay sa lungsod, minsan ay hinahanap ng ating kaluluwa ang katahimikan—isang lugar kung saan makakahinga tayo nang malalim at muling makakaugnay sa kalikasan. Ito ang dahilan kung bakit pinili naming maglakbay patungong Vidden Valley, isang tagong paraiso sa bayan ng Pinamungajan, Cebu.

Ang biyahe patungo sa Vidden Valley ay hindi basta-basta. Kinailangan naming bumiyahe ng ilang oras, tumawid sa matatarik na daan, at maglakad sa mapunong kagubatan. Ngunit sa bawat hakbang ay tila ba unti-unting nawawala ang pagod. Ang simoy ng hangin ay malamig, malinis, at may halong halimuyak ng mga damo at bulaklak. Ang tanawin ay para bang isang pintang likha ng isang alagad ng sining—malalawak na damuhan, mga bulubunduking tila humahaplos sa langit, at katahimikang tila naglalambing sa kaluluwa.

Sa Vidden Valley, mararamdaman mo ang pagiging maliit mo sa harap ng dakilang kalikasan. Walang ingay ng trapiko, walang cellphone signal, walang abalang gawaing-bahay—tanging ikaw, ang iyong sarili, at ang kalikasan. Sa simpleng panahong ginugol namin doon, marami akong napagtanto. Sa panahon ngayon na puno ng stress at teknolohiya, mahalagang bumalik sa mga ganitong lugar para muling mag-recharge—hindi lang ng katawan, kundi pati ng isip at puso.

Nang kami'y pauwi na, bitbit ko ang mga alaala ng Vidden Valley: ang malamig na hangin, ang tunog ng mga kuliglig sa gabi, at ang mga kwentuhan sa ilalim ng mga bituin. Ngunit higit sa lahat, bitbit ko ang katahimikang matagal ko nang hinahanap.

Ang paglalakbay na ito ay hindi lang basta pamamasyal—ito ay naging isang paglalakbay pabalik sa sarili.

Abstrak

Ano ang Abstrak?

Ang abstrak ay isang maikling buod ng isang pananaliksik, artikulo, o akademikong papel. Layunin nitong ipakita sa mambabasa ang kabuuang ideya ng pag-aaral nang hindi na kailangang basahin ang buong dokumento. Kadalasang makikita ito sa simula ng isang papel o tesis.

Nilalaman ng Abstrak:

Paksa o isyu na tinatalakay
Layunin ng pag-aaral
Pamamaraan ng pananaliksik
Pangunahing natuklasan o resulta
Konklusyon o rekomendasyon

Example:

Isyung Panlipunan: Ang Mental Health sa Mga Kabataan

Sa paglipas ng mga taon, patuloy na lumalalim ang usapin ukol sa mental health, partikular na sa sektor ng kabataan. Sa kabila ng makabagong teknolohiya at mas malawak na access sa impormasyon, nananatiling hamon ang pagtanggap at pag-unawa sa mga isyung may kinalaman sa kalusugang pangkaisipan. Ang pananaliksik na ito ay tumatalakay sa mga salik na nakaapekto sa mental health ng mga kabataang Pilipino, kabilang na ang presyon mula sa akademya, social media, at kapaligirang panlipunan. Layunin ng pag-aaral na ilahad ang antas ng kaalaman ng kabataan ukol sa mental health, tukuyin ang mga karaniwang suliraning kinahaharap nila, at suriin ang mga umiiral na programang sumusuporta sa kanilang pangangailangan. Gumamit ng kwalitatibong pamamaraan sa pangangalap ng datos mula sa mga piling kalahok sa senior high school. Lumitaw sa pag-aaral na karamihan sa mga kabataan ay dumaranas ng anxiety at stress ngunit madalas itong hindi natutugunan dahil sa stigma at kakulangan ng suporta. Inirerekomenda ng pag-aaral ang mas agresibong kampanya sa edukasyon ukol sa mental health at ang pagbibigay ng accessible na serbisyong psychological sa mga paaralan. Sa huli, naniniwala ang mananaliksik na ang pagtutok sa mental health ay hindi lamang usapin ng kalusugan, kundi isang mahalagang hakbang tungo sa mas inklusibo at maunlad na lipunan.

Sulating Akademiko

Sulating Akademiko (Academic Writing)

Sulating akademiko ay isang uri ng pormal na sulatin na ginagamit sa mga institusyong pang-edukasyon. Layunin nito ang magpahayag ng kaalaman, magsuri ng impormasyon, at maglahad ng argumento batay sa pananaliksik. Kadalasang ginagamit ito sa paggawa ng tesis, sanaysay, papel-pananaliksik, at iba pang gawaing akademiko.

Katangian ng Sulating Akademiko:

Pormal ang tono at wika
May malinaw na estruktura (panimula, katawan, kongklusyon)
Batay sa ebidensya o datos
Layunin ang magbigay ng impormasyon, hindi mag-aliw

Siyam na Uri ng Sulating Akademiko

a. Abstrak

Isang maikling buod ng isang pananaliksik o pag-aaral. Naglalaman ito ng pangunahing layunin, metodolohiya, resulta, at kongklusyon ng papel. Ginagamit ito upang bigyan ng ideya ang mambabasa tungkol sa nilalaman ng buong pag-aaral.

b. Sintesis

Isinusulat upang pagsama-samahin ang mga mahahalagang ideya mula sa iba’t ibang sanggunian. Layunin nitong maipakita ang kabuuang pananaw o kaisipan ng ilang pinagkunan, at ginagamit ito lalo na sa pagsulat ng literatura o background ng pag-aaral.

c. Bionote

Maikling tala tungkol sa personal na impormasyon ng isang tao—kadalasang manunulat o tagapagsalita. Inilalahad dito ang edukasyon, propesyon, at mahahalagang nagawa ng indibidwal.

d. Replektibong Sanaysay

Naglalaman ng personal na pagninilay o repleksyon ng manunulat tungkol sa isang karanasan, aralin, o isyu. Layunin nitong ipakita ang ugnayan ng karanasan sa natutunan o pananaw ng manunulat.

e. Pictorial Essay (Larawang Sanaysay)

Isang uri ng sanaysay na gumagamit ng larawan at kaakibat na maikling teksto upang maglahad ng kwento o ideya. Pinaghalong biswal at tekstwal na pagpapahayag.

f. Agenda

Isang listahan ng mga paksang tatalakayin sa isang pulong. Nagsisilbing gabay upang maging maayos at sistematiko ang daloy ng pagpupulong.

g. Katitikan ng Pulong

Opisyal na tala ng mga nangyari sa isang pulong. Nakasaad dito ang mga paksang tinalakay, desisyong ginawa, at mga aksyong napagkasunduan.

h. Talumpati

Isang sinulat na pahayag na binibigkas sa harap ng publiko. Maaaring nagbibigay-impormasyon, nanghihikayat, o naglalahad ng saloobin ukol sa isang isyu.

i. Lakbay Sanaysay

Isang sulatin tungkol sa mga karanasan at obserbasyon ng manunulat habang nasa isang paglalakbay. Kalimitang naglalaman ng personal na damdamin, natutunan, at mga natuklasan sa paglalakbay.